Beğen 0

Arpaeminizade Sami Âsaf-i Hân Ahmed-i Gâzî Vezîr-i Bî-nazîr şiiri

Âsaf-i Hân Ahmed-i Gâzî Vezîr-i Bî-nazîr

Âsaf-i hân Ahmed-i gâzî vezîr-i bî-nazîr
Kim refâh-i kevne bâ’isdür vücûd-i nâfi’i

Hazret-i şâhenşehün dâmâd ü sadr-i a’zamı
Zıll-i Yezdânun çerâg-i pür-fürûg-i sâtı’ı

Sâhibü’l-hayrât İbrâhîm paşa kim odur
Âsmân-i birr ü cûdun âftâb-i lâmi’i

Ser-firâz-i ser-firâzân-i himem sâhib-kerem
Kim odur râyât-i zer-mancûk-i lutfun râfi’i

Çekdi pîş-i buhle İskender gibi sedd-i sedîd
Şark ü garbı tutdı âvâz-i ‘atâ-yi şâyi’i

Şin ü âbâd itmedür dünyâyı kasdı dâ’imâ
‘Âlemün âsâyişidür fikr-i tab’-i bâri’i

Kârı hep celb-i kulûb ü hayr ü ‘adl ü dâd olup
Hîç ‘abes bir fi’le yokdur nakd-i vakt-i zâyi’i

Kalmadı yapılmaduk ‘ahdinde bir cây-i harâb
Her yeri ma’mûr idüp te’sîr-i necm-i tâli’i

Şimdi ez-cümle idüp manzûr-i çeşm-i iltifât
Nev-şehirde eyledi inşâ bu ra’nâ câmi’i

Menşe’-i pâk-i vücûdı olmag ile ol mahal
Eyledi şehr-i mu’azzam gör bu feyz-i sâni’i

Medrese câmi’ ‘imâret ‘aynlar bünyâd idüp
Kıldı hayrât ile şâdân rûh-i pâk-i şâri’i

Bu eserden olsalar âgeh n’ola ervâh ile
Mâlik ü Hanbel İmâm-i A’zam ü hem Şâfi’î

Bâreka’llâh ma’bed-i pâkîze-tarh-i dil-nişîn
Kim melâ’ikdür anun geh vâridi geh râci’i

İdüp âmed-şud sürûşân-i İlâhî dem-be-dem
Feyz-yâb eyler kulûb-i mü’minîn-i tâyi’i

Secde itdükçe musallîler salât-i hamsede
Rahmet-i Hakdur der-i tâ’at-me’âbı kâri’i

Olıcak şâh-i menârında mü’ezzin ‘andelîb
Gül gibi eyler şüküfte gûş-i kalb-i sâmi’i

Minberidür gerden-i havrâ-yi ‘înün heykeli
Kubbesidür nüh sipihrün tâc-i fark-i tâli’i

‘Ömrin efzûn eyleyüp tevfîküni eyle refîk
Haşre dek bâkî kala yâ Rab bu hayr-i nâfi’i

Gûş idüp itmâmını târîhin eylerken su’âl
Virdi bu mısra’ ile tab’um cevâb-i kâtı’ı

Resm-i ‘Osmâniyle Sâmî söyledüm târîhini
Câmi’ü’n-nûr oldı İbrâhîm Paşa Câmi’i

Sene 1139

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz