Beğen 0

Arpaeminizade Sami Bâreka'llâh Zihî Sûr-i Hümâyûn-safâ şiiri

Bâreka'llâh Zihî Sûr-i Hümâyûn-safâ

Bâreka’llâh zihî sûr-i hümâyûn-safâ
Ki şeh-i ‘âleme şeh-zâdeyi lutf itdi Hudâ

Nice şeh mâ-hasal-i silsile-i ‘Osmânî
Nice şeh râbıta-i devlet-i dîn ü dünyâ

Himmet-âmûz-i kerem ma’delet-efrûz-i himem
Şâh-i Cemşîd-haşem sâye-i lutf-i Mevlâ

Kutb-i gerdûn-i cihânbânî vü ‘âlem-gîrî
Merkez-i dâ’ire-i emn ü amân-i eşyâ

Şâh-i gerdûn-’azamet dâver-i Dârâ-heybet
Husrev-i memleket İskender-i fermân-fermâ

Mazhar-i lutf-i ezel hazret-i sultân Ahmed
Kim anun bendesidür şâh Kubâd ü Dârâ

O şehenşâh-i kader-re’y ü hıred-çâker kim
Dest-i tedbîrine münkâd girîbân-i kazâ

O felek-pâye hudâvend-i cihân-ârâ kim
Zîr-i destindedür ahkâm-i ümem ser-tâ-pâ

Çihre-i devletine fehm ü hıred âyîne
Kâmet-i himmetine lutf ü kerem zeyl-i kabâ

Hüsn-i idrâkine meftûn ‘ukûl-i ‘aşere
Rûy-i insâfına dil-dâde sipihr-i vâlâ

Böyle bir pâdşeh-i ‘âdil ü pür-insâfun
Görmedi misl ü ‘adîlini bu çeşm-i dünyâ

Eyledi hazret-i Hak ol şeh-i ‘âlem-gîre
Bir güher pâresi ferzend-i necîbi i’tâ

Görmemiş mislini ‘âlemde selâtîn-i selef
Gelmemişdür sadef-i dehre bu dürr-i yektâ

Muktezâ-yi eser-i nâm-i şerîfidür anun
K’eyledi makdemi eşbâh-i cihânı ihyâ

Âsmân ahter ile mehd-i sadef-kârîde
Şu’le-i mihr ana zerrîn-sütûn-i zîbâ

‘Acz ile hazret-i şeh-zâde-i ‘âlî-şâna
Köhne olmasa iderdüm anı ‘arz ü ihdâ

Gevher-i ‘ıkd-i süreyyâyı ana dâye-i çerh
Kılsa âvîze-i gehvâre-i şeh-zâde sezâ

Söz tamâm oldı yeter vakt-i du’âdur Sâmî
Eyle hân Ahmed ü şeh-zâdeye sıdk ile du’â

Tâ ki âsârı zuhûr eyleye seyyârâtun
Dâ’imâ devr ide ‘âlemde bu çerh-i mînâ

Zât-i pâki ola âsîb-i cihânda mahfûz
Pâdşâhumla ma’an ide mu’ammer Mevlâ

Yazdı levhe kalem-i kâtib-i kudret târîh
Hey’et-i ‘âleme rûh oldı kudûm-i ‘Îsâ

Sene 1117

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz