Beğen 0

Arpaeminizade Sami Cenâb-i Hazret-i Sultân-i ‘Âlem Hân Ahmed Kim şiiri

Cenâb-i Hazret-i Sultân-i ‘Âlem Hân Ahmed Kim

Cenâb-i hazret-i sultân-i ‘âlem hân Ahmed kim
Der-i devlet-me’âbı reşk-i çerh-i çârümîn oldı

İdüp bu mesned-i pâkîzenün bünyâdını fermân
Yapıldı hak bu kim bir taht-i zîbâ şeh-nişîn oldı

Nigâh-i iltifâta vâkı’â muhtâc imiş böyle
Bu mevzi’ kim nişîmengâh-i şâh-i kâm-bîn oldı

Te’âla’llâh zihî evreng-i matbû’-i hümâyûn kim
Mahall-i dil-güşâ tarh-i cedîd-i nâzenîn oldı

‘Aceb mi olsa mi’mâr-i hıred meftûn ü hayrânı
Ki nev-îcâd-i tab’-i şehryâr-i hurde-bîn oldı

Sezâdur cilvegâh-i pâdşâh-i nâmdâr olsa
Musanna’ tarh ile mânende-i fass-i nigîn oldı

Rüsûm-i nâzüki ser-nâme-i Dîvân-i Şevketdür
Letâfetle yapılmış şâh-beyt-i nev-zemîn oldı

Müşîr-i pîşgâh-i manzarıdur sâha-i ikbâl
Esâs-i nerdbânı sahn-i firdevs-i berîn oldı

Mücellâ câmlarla pertev-i nakş [ü] nigârından
Şu’â’-i şems-i tâbân şerm ile ser-der-zemîn oldı

O pervâz-i müşebbek turre-i bâm-i latîfinde
Misâl-i şâne-i gîsû-nevâz-i hûr-i ‘în oldı

Hümâyûn-suffe-i sadrü’s-sudûr-i saltanatdur bu
Müferrih bî-bedel maksûre-i devlet-karîn oldı

Bu kasrı eyle yâ Rab dâ’imâ ma’mûr ü âbâdan
Ki sultân-i cihân anda sa’âdetle mekîn oldı

Derûnında kemâl-i pîr ola şeh-zâdegânıyla
Ki zât-i pâki dehre lutf-i Rabbü’l-’âlemîn oldı

Mu’ammer ola tûl-i ‘ömr ile zevk ü meserretle
Şeb ü rûz itdügüm Hakdan bu da’vât-i güzîn oldı

Tasavvur eyler iken bi’l-bedâhe vakt-i itmâmın
Bu mısra’ zîb-i nevk-i hâme-i feyz-âferîn oldı

Didi târîhini ‘abd-i hakîr-i dergehi Sâmî
Makâm-i şâh-i ‘âlî câygâh-i dil-nişîn oldı

Sene 1133

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz