Beğen 0

Arpaeminizade Sami Dâver-i A’zam Ü Efham Şeh-i Hurşîd-’alem şiiri

Dâver-i A’zam Ü Efham Şeh-i Hurşîd-’alem

Dâver-i a’zam ü efham şeh-i hurşîd-’alem
Mesned-efrûz-i haşem husrev-i Cemşîd-nişân

Câ-nişîn-i hulefâ mâlik-i şemşîr-i gazâ
Râyet-efrâz-i vegâ saf-şiken ü kal’a-sitân

Mazhar-i lutf-i Hudâ hazret-i sultân Ahmed
Memleket-gîr-i mü’eyyed ser-i şâhân-i cihân

Heft iklîme yedi bahre güher-pâş-i kerem
Kâfdan Kâfa kefi kâfî-i lutf ü ihsân

O hudâvend-i mu’azzam ki Hudâ-yi müte’âl
Eylemiş dergehini şâh-reh-i kehf-i amân

Hükm-fermâ-yi ‘Arab pâdşeh-i Rum ü ‘Acem
Râmdur emrine ser-cümle havâkîn-i zamân

Tîg-i ser-tîzidür a’dâyı perîşân kılıcı
Hüsn-i tedbîri cihâna sebeb-i emn ü amân

Boyadı kana kızılbaşlarun kellelerin
Bahr-i hûn üzre habâb oldı ser-i surh-serân

Habbezâ savlet-i şîrâne-i şâhenşâhî
K’eyledi şî’a-i murdârı perîşân çü segân

Bâreka’llâh ne kerâmet ne mehâbetdür kim
Tahtgâhında iken ol şeh-i iklîm-sitân

Yüz konak râh-i ba’îde idüp irsâl-i cüyûş
Darb-i desti ile vîrân ola mülk-i Îrân

Hak bu kim âsaf ü dâmâd-i şehenşâh-i cihân
İtdi bu kârda çok temşiyet-i bî-pâyân

Hayr-hâhâne velî-ni’metine hidmet idüp
Rûz ü şeb itmedi tedbîrde kat’â noksân

İdüp âmâde mühimmât ü levâzım ne ise
Kılmadı sarf-i tedârükde tesâmuh bir ân

Hâsılı böyle gerek işte vekîl-i mutlak
Kim sadâkatla ide hidmet-i şâh-i devrân

Eyleyüp şâh-i cihân ile mu’ammer zâtın
İde tedbîrini takdîre muvâfık Yezdân

Düşmen-i devlete hemvâre olup nusret-yâb
Hasm-i bed-kârları ola rehîn-i hizlân

Râfızî ref’ine çünkim o şeh-i âfâkun
Eyledi himmet-i şâhânesi dilde heyecân

Bendesi vâlî-i Bagdâdı idüp ser-’asker
İtdi ser-hadde yakın yerleri fethe fermân

Sa’y idüp ol dahı ber-mûcib-i emr-i ‘âlî
Oldı bu maslahat itmâmına dâmen-be-miyân

Evvelâ hısn-i hasîn-i Hemedânı sardı
İtdi mahsûr anı çün hâle-i mâh-i tâbân

Ceyş-i encüm-’adedi sünnî-i pâkîze-nihâd
Burc ü bârûlarını aldılar ortaya hemân

Hânmân-sûz-i revâfız olarak her sûdan
Urdılar top ü tüfeng hum-bara-i şu’le-feşân

Yandı nâr-i gazab-i Hakka teberrâyîler
Gûyiyâ cünd-i sürûş eyledi recm-i şeytân

Himmet-i şâh-i cihân-gîr-i Ferîdûn-fer ile
Sehl müddetde zuhûr eyledi feth-i Hemedân

Nice nusretlere mazhar ola ol dâver-i dîn
Müteyemmin ola bu feth-i celîlü’l-’unvân

Feth-i Tebrîz ü Revânı dahı idüp teshîl
‘An-karîb eyleye Allâhu te’âlâ ihsân

Devlet ü ‘ömrini efzûn ide Hak ‘azze ve cel
Ola evkâti meserretle hemîşe güzerân

Gûş idince haber-i feth ü fütûhı Sâmî
Şevk ile mısra’-i târîhin olurken cûyân

Geldi tebşîr ile üçler didiler târîhin
Hemedân beldesin aldı ‘Acemün Ahmed hân

Sene 1136

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz