Beğen 0

Arpaeminizade Sami Ey Vücûdun Sebeb-i Rif’at-i Şân-i Devlet şiiri

Ey Vücûdun Sebeb-i Rif’at-i Şân-i Devlet

Ey vücûdun sebeb-i rif’at-i şân-i devlet
Âstân-i keremün kehf-i amân-i devlet

Müftehir hidmet-i dergâhun ile câh ü celâl
Mürtefi’ nisbet-i zâtunla mekân-i devlet

Perveriş-yâfte-i pençe-i hurşîd-i kemâl
Bihterîn-gevher-i gencîne-i kân-i devlet

Dökmege âb-i ruhın dâmenüne teşne fuhûl
Hem mükedder yem-i bî-ka’r ü kerân-i devlet

Reşha-i âb-i hayât-i kalem-i lutfundur
Ten-i fersûde-i kâm-i dile cân-i devlet

Cûşiş-âmûz-i muhît-i ‘azametdür câhun
Ey kefi menba’-i sad-lücce-feşân-i devlet

Teşne-i deşt-i temennâya devâtundan olur
Mevc-der-mevc hurûş âb-i revân-i devlet

Hâtem-i şâhid-i ikbâlüne el-hak yaraşur
Nakş-i nîkû-eser-i nâm ü nişân-i devlet

Felke-i râyet-i zer-şemse-i eyvânundur
Neyyireyn-i felek-efrûz-i cihân-i devlet

Kâf-i ikbâlde ‘ankâ-yi şükûhunla hümâ
Olamaz hem-ser-i bâl-i tayerân-i devlet

Cûd-i isbât-i vücûd itdi vücûdunla senün
Şâhidümdür buna kilk-i dü-zebân-i devlet

Pençe-i mihr gibi sâ’id-i bahtun ter ider
Olsa da kavs-i kuzah denlü kemân-i devlet

Zabta kim kâdir idi esb-i harûn-i felegi
Olmasa kabza-i destünde ‘inân-i devlet

Kerem ü cûd ile reşk-âver-i fazl-i Hâtem
‘Akl ü tedbîr ile Risto-yi zamân-i devlet

Göricek rütbe-i haysiyyet-i isti’dâdun
Hasr idüp didi Felâtûn-nişân-i devlet

Görmese bilmez idi kimse sevâd-i kalemün
Ne imiş nüsha-i pâkîze-beyân-i devlet

Kim bilürdi kerem oldugını nâmun birle
İtmesen hall-i mu’ammâ-yi benân-i devlet

Sebkat itdi küremâ-yi selefi dirsem olur
Vech-i rüchâna makar Bermekiyân-i devlet

Sana mahsûsdur âyîn-i semâhat bi’llâh
Yokdur eslâfda bu tâb ü tüvân-i devlet

Gelse ‘ahdünde Aristo vü Nizâm ü Âsaf
Hep olurlardı sana menkabe-hân-i devlet

Hâsılı gelmedi zâtun gibi bu mesnede hîç
Sadr-i sâhib-hıred ü nâdire-dân-i devlet

Eyleyüp ‘âleme na’mâ-yi ‘atâyı yagmâ
Ey velî-ni’met-i ser-halka-i hân-i devlet

Besledi halkı ‘akîdeyle zer-i ihsânun
Oldı pür şekker-i şükrünle dehân-i devlet

Var iken zât-i şerîfün gibi düstûr-i güzîn
Yâda gelsün mi fülân ibni fülân-i devlet

Gelmedi sencileyin dehre vezîr-i a’zam
Görmedi mislüni çeşm-i nigerân-i devlet

Tumturak-i haşem ü ‘adlüni görse kul olur
Sana İskender ile Nûşirevân-i devlet

Gayrı evsâfa ne hâcet bu şeref kâfîdür
Hazret-i pâdşeh-i kevn ü mekân-i devlet

Seni dâmâd idinüp itdi vekîl-i mutlak
Eyleyüp zâtunı mümtâz-i cihân-i devlet

Sadr-i rûşen-güherâ âsaf-i ‘âlî-kadrâ
Ey ki nakş-i kademi tâc-i serân-i devlet

Dâne-çînân-i simât-i kerem ü cûdundur
Sîr-çeşm oldı bütün hurd ü kelân-i devlet

Bâ-husûs ehl-i dil ü tab’a idüp bezl-i tamâm
Oldılar gıbta-dih-i devletiyân-i devlet

Her biri rütbe-i hâlinde suhan-sâzânûn
Hak budur k’oldı ser-efrâz-i cihân-i devlet

Kâle-i zer-keş-i eş’ârı iden pây-endâz
Buldı tamga-yi kabûlünle nişân-i devlet

Bâreka’llâh zihî germî-i bâzâr-i kerem
Fart-i sûd eylemede mahv-i ziyân-i devlet

Hâsılı fikr-i medîhünle du’â-gûyundur
Sana her şâ’ir-i mu’ciz-suhanân-i devlet

Her nefes zikr-i cemîlünle olup sübha-şümâr
‘Âlem olmakda sana menkabe-hân-i devlet

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz