Beğen 0

Arpaeminizade Sami Hilâl-i ‘Îd Kim Pîrâye-bahş-i Çerh-i Mînâdur şiiri

Hilâl-i ‘Îd Kim Pîrâye-bahş-i Çerh-i Mînâdur

Hilâl-i ‘îd kim pîrâye-bahş-i çerh-i mînâdur
‘Amûd-i subh ile tâk-i binâ-yi ‘arş ber-pâdur

Zihî subh-i tarab kim gerden-i cânân gibi mergûb
Sevâd-i leyl ise mânend-i zülf-i ‘anberâsâdur

Serinde şâhid-i ‘îdün hilâlî oldı destârı
Sarılmış nâzükâne hak budur kim tarz-i zîbâdur

Kıyâs itdüm görüp şekl-i hilâl-i behcet-efzâyı
Dem-i vuslat çözilmiş tügme-i ceyb-i dil-ârâdur

Kamer kim nâvdân-i sîmdür bâm-i sipihr üzre
N’ola nûr aksa andan çeşme-i hûr ana mecrâdur

Hilâlün gûşe-i ebrû ile telmîhi ‘uşşâka
Geh âgûş-i miyân geh bûs-i la’l-i şûh-i ra’nâdur

Felek ‘aynıyla bir şemsiyye sâ’atdur meh-i şevvâl
Mukaddem lafz-i ‘îdün ‘aynı çıkmış anda peydâdur

Olup imsâk ile pür-’ukde hayt-i ebyazı fecrün
Ki halle nâhun-i meh evvel-i şebden müheyyâdur

Ser-engüşt-i şu’â’ı pençe-i mihr-i dırahşânun
Açup târ-i seherden bend-i savmı ‘ukde-fersâdur

Güşâde itmege kufl-i dehân-i rûzedârânı
Hilâl-i âsmân miftâh-i sîmîn-i mücellâdur

Tehî bir kâsedür sad âferîn mâh-i nev-i ‘îde
Cihâna bezl-i na’mâ-yi ‘atâsı hân-i yagmâdur

Ayaklansun çekilsün sâgar-i sahbâ gibi rindân
Meh-i nev sûy-i ‘işretgâha kim engüşt-i îmâdur

Şafakla âsmân gûyâ hum-i mey-hâne-i ‘işret
Kenârında meh-i nev câm-i billûrîn-i sahbâdur

Çıkardı sâhil-i magrib-zemîne gavs idüp hurşîd
Sadef-pâre meh-i nev çerh-i mînâ bahr-i hadrâdur

Meger tebrîk-i ‘îd-i âsaf-i ‘âlî-cenâb eyler
Ki meh ta’zîm-i dâmen-bûsda ham-geşte-bâlâdur

Cenâb-i âsaf-i devrân ki nakş-i sümm-i rahşından
Hilâl-i ‘îdveş sad-şekl-i müstahsen hüveydâdur

Yegâne-şeh-süvâr-i sahn-i himmet kim semendinden
Çıkan her bir şerâr-i na’li dâg-efrûz-i şi’râdur

Hazîz-i âstânı evc-i eflâk üzre müsta’lî
Gubâr-i reh-güzârı gevher-i tâc-i süreyyâdur

Şu’â-i mihr eyvânında zer-târ-i serâ-perde
Sabâh-i ‘îd dihlîz-i derinde ferş-i dîbâdur

Eger tek tursa terk-i inkılâb itse o dergâhun
Hilâl olmaklıga tâkında çift evlâ vü ahrâdur

Ser-i câ-rûb meydân-i derinde zerre-i nâ-çîz
Cevâhir kuhl-i çeşm-i âftâb-i ‘âlem-ârâdur

Derinde Ma’n ü Hâtem iki cârû-keş gulâmıdur
Yanında rahşınun ‘abd-i meges-rândârı Dârâdur

Vezîr-i a’zam-i zî-şân ki dest-i gevher-efşânı
Tehî-sâz-i künûz-i muhtefî-i kân ü deryâdur

Ne deryâdur ki kemter katresi tûfân-i heybetdür
Ne kândur zerresi ser-mâye-i iksîr-i ‘uzmâdur

Midâdı ‘anber-i sâhil-res[-i] bahr-i semâhatdür
Kalem destinde deryâ-yi pey-â-pey-cûşa mecrâdur

Kef-i in’âm ü cûdı bir muhît-i bî-kerândur kim
Hemîşe cezri yok emvâcınun meddi ser-â-pâdur

Dil ü desti midâdı feyz-i kilki meşreb-i sâfı
Reh-i âmed-şud-i dergâhı lutfı heft deryâdur

Yedi deryâ ne kâdir ‘öşr ü mi’şârı kadar feyze
Yedi vakt-i ‘atâ bir katre îsâr itse deryâdur

Zamân-i devletinde her gedâ sâhib-nisâb oldı
Denânîr ü direm îsâr-ber-îsâr-i yagmâdur

Dimiş vasf-i selefde Nef’î ammâ şimdi ‘âlemde
Kerîm ü kâm-rân var ise İbrâhîm paşadur

Müzehhebdür kitâb-i müstetâb-i lutf ü ihsânı
Ser-â-ser nüsha-i pâkîze-i cûdı muhaşşâdur

İden pür sâgar-i gûşın mey-i hüsn-i hitâb[un]dur
Kadeh-şûy-i dehân-i ârzû-yi keyf sahbâdur

Bezimgâhında mâh-i hâledâr encümle etrâfı
Gümiş pullarla gûyâ sufre-i şem’-i şeb-ârâdur

Kalem pergâr-i tevfîk ile dehrün nakş-i tedbîri
Bilâ-kayd-i tasavvur levh-i idrâkinde peydâdur

Nihâd-i pâki ‘ıtr-i kâbiliyyetle muhammerdür
Zamîr-i fıtratı iksîr-i hikmetle mürebbâdur

İdüp devr-i safâ-bahşında tahsîl-i refâhiyyet
Cihânun halkı el-hak mazhar-i eltâf-i mevlâdur

‘Adâlet bî-şümâr ü merhamet bî-had kerem mebzûl
Felekden ehl-i hâcet şimdi bî-kayd-i temennâdur

‘Aceb lutf-i İlâhîdür vücûd-i pâki âfâka
Ne gelmişdür selefde ne gelür bî-misl ü hemtâdur

Melek memnûn-i hayrâtı beşer gark-i ‘atiyyâtı
Yed-i ‘ulyâsı pey-der-pey-dih-i a’lâ vü ednâdur

Mühim-perdâz-i kânûn-i ‘adâletdür ki ahkâmı
Nesak-sâz-i umûr-i mu’dilât-i dîn ü dünyâdur

Her etvârı müsellem her işi memdûh-i ‘âlemdür
Anunçün zâtı mahbûbü’l-kulûb-i pîr ü bernâdur

Sahâda Bermekî tedbîr-i ‘âlemde Aristodur
Fetânetde Felâtûndur hikemde İbni Sînâdur

Tesâvî üzredür mîzân-i çeşm-i i’tibârında
Ya zerdür yâ güher yâ hâkdür yâ seng-i hârâdur

Hıdîvâ âsafâ sadrâ vezîr-i âsmân-kadrâ
Gubâr-i dergehün kim çerhe ser-tâc-i müheyyâdur

Sen ol düstûr-i ‘âlî-şân-i sâhib-cûd ü himmetsin
Ki derbân-i der-i lutfun ya İskender ya Dârâdur

Güşâde bâb-i lutfun ‘adl ü dâdun bî-nihâyetdür
Husûsâ ehl-i tab’a re’fetün bîrûn-i ihsâdur

Ehâlî-i suhan yek-ser müreffehdür zamânunda
Metâ’-i ârzûlar cins-i hâhişler müheyyâdur

Dü-çeşm-i hurde-bînün çâr-sûy-i kâbiliyyetde
Terâzû-yi cevâhir-senc-i kadr-i şi’r ü inşâdur

Bilürsin her kesün âmâlini ta’rîfe hâcet yok
Nigâh-i mû-şikâfun nükte-fehm-i tarz-i sîmâdur

Benüm de maksad-i mâ-fi’z-zamîrüm var ‘ıyân itmem
Egerçi hâk-i pâya kasdum anı ‘arz ü inhâdur

Mukarrerdür bilinmek muktezâ-yi vakt ü hâl üzre
Ne denlü matlabum setr eylesem de âşkârâdur

Tamâm oldı suhan tekmîl-i da’vât ile maksûdum
Berât-i mansıb-i ihlâsumı tecdîd ü ibkâdur

Hamûş ol Sâmiyâ gayrı bilindi gâyet-i me’mûl
Münâsib ba’d ez-în zikr-i du’â-yi ‘arş-peymâdur

Olup gerdân bu tâk-i lâceverd-endûd-i mînâ-reng
Hilâl-i ‘îd tâ her sâl çerh üzre hüveydâdur

Şebi kadr ola rûzı ‘îd ola dâ’im meserretle
Ki ‘ahd-i devleti âfâkdan endûh-fersâdur

Mu’ammer ide tûl-i ‘ömr ile Hak zât-i mes’ûdın
‘Adûsı hâr ola ‘izzet bula ol kim ehibbâdur

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz