Beğen 0

Arpaeminizade Sami Nev-bahâr İrdi Yine Oldı Cihân Hurrem Ü Şâd şiiri

Nev-bahâr İrdi Yine Oldı Cihân Hurrem Ü Şâd

Nev-bahâr irdi yine oldı cihân hurrem ü şâd
Eyledi şûre-zemîn-i gamı firdevs-âbâd

Zîver-i rûy-i dükân oldı metâ’-i şâdî
Reste-bâzâr-i kesel oldı be-hem-pîç-i kesâd

Kâleb efsürde iken irdi nebâtâta hayât
Âşkâr oldı yine ma’nî-i haşr-i ecsâd

Öyle nakş eyledi levh-i güle üstâd-i ezel
Cânı var mı k’ide tasvîr anı kilk-i Bih-zâd

Kıldı sahn-i çemene darb-i hıyâm-i ‘işret
Dâver-i nâmiye çâder çiçegin itdi güşâd

Tab’-i yâbis o kadar oldı rutûbet-âgîn
Gül-i rengîn olur ahger yerine zîb-i remâd

Çâr-sûy-i çemenistânda dellâl-i hezâr
Hâs ü ‘âma güher-i ‘işreti itmekde mezâd

Hâbdan dîde-güşâ oldı çemende nergis
Subh-dem fâhte vü bülbül idince feryâd

Ser-fürû-bürde-i hüzn olsa benefşe n’aceb
Gonçeler olmış iken mâye-i gül-hand-i murâd

Ceyş-i sermâya hücûm eyledi sultân-i rebî’
Eyleyüp kartopını deşt-i çemende îcâd

Bezmi gülşende kurup nahl-i güli çeng idicek
Başladı nagmelere murg-i terennüm-mu’tâd

İtmege geşt-i hıyâbân-i sipihr-i hadrâ
Dest-ber-dest-i vifâk oldı çenâr ü şimşâd

Kalem-i mâşıta-i sun’ ile çün bâg-i na’îm
Gülşenün rûz-be-rûz olmada hüsni müzdâd

Kuvvet-i nâmiyede öyle tekâzâ var kim
Olsa hurşîd-i cihân-cûya eger pertev-dâd

Hey’et-i ‘aksi olup ser-zede çün nîlûfer
Bûyı eyler dem-i ‘Îsâ gibi tefrîh-i fu’âd

‘Aks-i verd-i ter olur âyineden nükhet-sâz
Gülşeni tâ o kadar itdi hevâ feyz-âbâd

Şûre yerler dahı bu demde nemâ-yâftedür
Zühd-i huşk ile meger sâha-i kalb-i zühhâd

Eser-i kâmile-i nâmiyeden olsa sezâ
Bûy-i hadrâ-yi zemîn gıbta-dih-i müşk ü zebâd

Levh-i sîm üzre hemân nakş-i kalem-kârîdür
Halka-ber-halka-i emvâc idüp cûları bâd

Varak-i sûsen ile lâle kılıç haftândur
Gönderür vâlî-i nev-rûza şeh-i ferruh-zâd

Nice şeh mihr-i cihân-tâb-i sipihr-i ikbâl
Nice şeh mâ-hasal-i memleket-i dâniş ü dâd

Şeh-i ferhunde-şiyem ma’delet-efrûz-i himem
Çihre-perdâz-i kerem âb-i rûh-i rüşd ü sedâd

Kahramân-pîşe hudâvend-i Tehemten-savlet
K’oldılar emrine şâhân-i zamâne münkâd

Vasf-i pâkin kalem-i nâdire-senc-i ma’nâ
Levh-i ta’zîme bu ta’bîr ile eyler inşâd

Mazhar-i lutf-i ezel sâye-i Hak ‘azze ve cel
Nâzım-i dîn ü düvel dâver-i pâkîze-nihâd

Âsmân-mertebe hân Ahmed-i deryâ-dil kim
Reşk ider kevkebe-i câhına Cemşîd ü Kubâd

Pâdşâh-i felek-evreng-i ‘adâlet-güster
Revnak-i saltanat ârâyiş-i iklîm ü bilâd

O şehenşâh-i kader-re’y-i hıred-fersâ kim
Zâtıdur ‘âleme mahz-i kerem-i Rabb-i ‘ibâd

Perde-i devletine atlas-i gerdûn ezyâl
Hayme-i rif’atine nûr-i kevâkib evtâd

Buldı ‘ahdinde mebânî-i salâh istihkâm
Lâne-i bûm-i ferâg oldı harâbât-i fesâd

Hîç umılmazdı ola böyle siyeh-kâse iken
Ehl-i ‘irfâna müsâ’id felek-i sifle-nihâd

‘İllet-i gâ’iye imdâd-i şehenşâhîdür
Yohsa lutf itmege kâdir mi sipihr-i bî-dâd

Minnet Allâha zamânında cihân âsûde
Bâ-husûs ehl-i dilün râhatı ber-vefk-i murâd

Güher-i hamd ü sipâsı şeref-i zâtı ile
Kudsiyân eyledi pîrâye-i silk-i evrâd

O rızâ-dâde-i takdîr-i Hudâ kim a’dâ
Safha-i sînede olsa rakam-ârâ-yi fesâd

Fi’l-mesel sâl-i hezâr olsa mukadder ‘ömri
Mün’akis zâ’id olur sıfr-i ulûf-i a’dâd

Şastı bir mertebe kim kavs-i hümâ-saydından
Virse bir kez o hadeng-i kader-endâza güşâd

Tarfetü’l-’aynda âvîze-i fitrâki olur
Murg-i hurşîd-i mülemma’-per-i çerh-i bî-dâd

Mûmdan olsa da peykân-i kazâ-te’sîri
Ten-i gırbâle döner şekl-i nişân-i fûlâd

Çâk olur safhada mânend-i dü-mısra’ kalemi
Vasf-i şemşîrini bir şâ’ir eger eylese yâd

Görse ol tîg-i kazâ-cevheri behrâm-i felek
Dehşetinden olur üftâde be-hâk-i münkâd

Berk-i samsâm-i cilâ-dâde-i düşmen-gîri
Oldı âteş-zen-i hırmenkede-i ehl-i ‘inâd

Olsa tab’ından eger vâye-pezîr-i idrâk
Kâbil-i hikmet-i insânî olur tab’-i cemâd

Gül-i hurşîde ider ta’ne giyâh-i hod-rû
Nâmiye eylese lutfından eger istimdâd

Olsa perverde-i ebr-i felek-i insâfı
Hârdan dâmen-i gül-gonçe olurdı âzâd

Himmeti olsa eger takviye-bahşâ-yi zafer
Per-i ‘ankâyı şikest eyler idi pây-i cerâd

Sahn-i gülşende vezân olsa nesîm-i ‘adli
Pençe-i hurdan ider şeb-nemi gül istirdâd

Sarsar-i kahrı vezân olsa ider bir demde
Bahri tennûr-i pür-âteş güherin fahm-i sevâd

Dîde-i terbiyeti olsa nigeh-sâz-i cihân
Gösterür beççe-i sî-murg ü hümâ beyze-i hâd

Behmen ü Husrev olur gâşiye-ber-dûşânı
Olsa şevketle süvâr-i feres-i şûh-nijâd

O sebük-seyr-i zemîn-gerd-i felek-peymâ kim
Düşmene her şerer-i na’li olur sâ’ika-zâd

Mâ-verâ-yi felegi sebkat ider nûr-i nigâh
Dîde-i râkibi sür’at demini eylese yâd

Olsa sür’atle cilev-rîz-i ‘inân reftârı
Peyk-i endîşe degül sâyesin eyler ib’âd

Sür’ati vasfını tahrîre irişmez hâme
İtseler nüh felegi hokka yedi bahri midâd

Dâverâ dâdgerâ husrev-i ‘âlî-güherâ
Ey şehenşâh-i ‘Ömer-’adl ü ‘Alî-isti’dâd

Bir iki beyt ile dergâhuna güstâhâne
İdeyüm mertebe-i tab’-i bülendüm îrâd

Devletünde benem ol şâ’ir-i sihr-âver kim
Olur âvâze-i nutkum güher-i gûş-i bilâd

Âb-i hayvân gibi oldı reşehât-i kalemüm
Zindegî-bahş-i ma’ânî-i füsürde-ecsâd

Âteşîn-nâtıkayam k’oldı sevâd-i nazmum
Hâl-i ruhsâr-i suhan dâg-i derûn-i hussâd

Kuvvet-i tab’umı dîvân-i suhanda hâme
İtdi her beyt-i dü-mısra’um ile istişhâd

Deste levh ü kalem alsam mele’-i a’lâdan
İrişür gûş-i dile zemzeme-i tahsîn-bâd

Feyz-yâb olsa eger lezzet-i güftârumdan
Telhî-i hanzal olur gayret-i şehd-i kannâd

Fenn-i eş’ârda sâhib-yed-i tûlâyam kim
‘Akl-i kül püşt-i kef-i ‘aczi ider pîş-nihâd

Geldi hengâm-i du’â eyleme ıtnâb-i suhan
Tâ-be-key lâf-i temeddühle bu teksîr-i sevâd

Eyle şimden girü sıdk ile du’â ey Sâmî
Müstecâb eyleye lutfıyla anı Rabb-i ‘ibâd

Eyleyüp feyz-i ‘amîm ebr-i bahârî tâ kim
Ola günden güne gülzâr-i cihân hurrem ü şâd

Görmeye rûy-i hazân bâgçe-i ikbâli
Hâr-i gamdan ola gül-gonçe-i zâtı âzâd

Tûl-i ‘ömr ile çemen-suffe-i devletde müdâm
Her şebi kadr ola her rûzı misâl-i a’yâd

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz