Beğen 0

Arpaeminizade Sami Olup Ey Hâme Senâ-kâr-i Hudâvend-i Ezel şiiri

Olup Ey Hâme Senâ-kâr-i Hudâvend-i Ezel

Olup ey hâme senâ-kâr-i hudâvend-i ezel
Eyle ser-tâc-i suhan nâm-i Hudâyı evvel

Olasın kufl-güşâ-yi der-i genc-i ilhâm
Mazhar-i cûd ide tâ kim seni Hak ‘azze ve cel

Magribî gibi sarîrünle ‘azîmet-hân ol
Kim ola feth-i tılısmât-i hakâyık eshel

Sa’y kıl kâviş-i ser-tîşe-i endîşe ile
Bulmaga keşf-i nihân-hâne-i feyze medhal

Olıcak fâtih-i gencîne-i râz-i tahkîk
Olur iksîr-i temennâ ile pür ceyb ü bagal

Kân-i feyz-i güher âbisten-i tab’-i pâke
İtse tevfîk seni dest-res-i müsta’cel

Sû-be-sû secde-ber-i şükr olup im’ân eyle
Kemterîn-zerre-i nâ-çîzine vaz’ itmedin el

Habbezâ kenz-i tabî’at ki felek gibi vesî’
Her bihîn cevheri reşk-âver-i hurşîd mahal

Tûde-ber-tûde yevâkît-i ma’ânî vü nikât
Gûşe-ber-gûşe hikem teng-i tefârîk ü halel

Olmış âvîhte-i mîh-i süveydâ-yi derûn
Anda bir hokka-i mahrûtî-i la’lîn-heykel

Evvelâ kıl anı mâlîde-i çeşm-i ta’zîm
Nâhun-i dest-i hayâl ile idüp mührini hal

Andan ol tuhfe-i pâkîzeyi izhâr it kim
Nâmıdur dürr-i girân-mâye-i ihlâs-i ‘amel

Bâreka’llâh zihî sıdk ü hulûs-i hâtır
Kim hakîkatde odur gevher-i bî-misl ü bedel

Şâhid-i midhat-i memdûha idüp fass-i nigîn
Eyle ithâf der-i mefhar-i erbâb-i düvel

Mefhar-i devletiyân melce’-i hâcetmendân
Mesned-ârâ-yi cihân mâ-hasal-i mülk ü milel

Kethudâ âsaf-i şâhenşehe bi’l-istiklâl
Dâver-i a’zama dâmâd-i vakûr ü a’kal

Cümleten mülke hayır-hâh vekîl-i mutlak
‘Akl ü tedbîr ile cümle vükelâdan ekmel

Hazret-i sadr-i felek-pâye Muhammed paşa
Kim odur mu’temed-i devlet-i şâh-i a’del

Tab’ıdur serv-i bülend-i çemen-i yek-rengî
Ki resîde olamaz dâmenine tab’-i cebel

İstikâmet dil-i pâkinde reh-i Ka’be-i sıdk
Safvet-i meşrebi çün zemzem-i kudsî-menhel

Hükmi hem-seng-i terâzû-yi kavânîn-i hikem
Vaz’ı ber-kâ’ide-i şer’-i nebiyy-i mürsel

‘Aklı üstâd-i suver-kâr-i mezâyâ-yi umûr
‘İlmi meşşâta-i pîrâye-dih-i hüsn-i ‘amel

Tügme-i ceyb-i kabâ çözme kadar âsândur
Dest-i tedbîrine her ‘ukde-i mâ-lâ-yenhal

Bâga bûy-i gül-i hulkıyla vezân olsa sabâ
‘Itr-i şâhî gibi bûy-âver olur sûm ü basal

Çâk-i zahmına bulur şahs-i nigâhı merhem
Olsa hâk-i kademi sürme-i çeşm-i ahvel

Şehdini pûte-i kendûda zer-i hâlis ider
Şem’-i bezm-i keremi şevkine zenbûr-i ‘asel

Ferkadânun kim ide beynini emri tefrîk
Şarkdan garb ola tâ bu’d-i miyân-i faysal

Cem’-i ezdâdı murâd eylese hükmi mihrün
Dizilür târ-i şu’â’ına dür-i şeb-nem ü tal

Eylese kevkeb-i bahtından eger deryûze
Lem’a-bahşâ-yi sa’âdet ola bircîse zuhal

Sûret-i hakda huzûrında eger nâtık olup
Mekr ü tezvîri tasavvur ide bir şahs-i dagal

Çeşm-i bârîk-nigâh-i dil-i derrâki ider
Lahza-i vâhidede seyr-i temâsîl-i hiyel

Kuvvet-i şân ü şükûhından olup vâye-pezîr
‘Azm-i kûh eylese bir mûr-i za’îf ü esfel

Bâz-gûn ide yerinden koparup keştîveş
Tarf-i dâmenine sâkıt ola püşt-i cebel

Görinür deştgeh-i himmetine nisbet ile
Cevher-i lâ-yetecezzâ gibi sahrâ-yi belel

Dâmen-i kûh-i vakârı ki ana sâye sala
Âsmâna çıka fi’l-hâl kemîn-püşte-i tel

Âftâb itse de engüşt-i şu’â’ıyla eger
Varak-i sîmini mâhun tabak-i hâlede hal

Şemse-i tâk-i zer-endûde-i câhına sezâ
İdemez zerre kadar yine tılâ-yi cedvel

O feres-rân-i sa’âdet ki meh-i garrâya
Şerer-i na’li olur şu’le-fürûz-i meş’al

Râ’iz-i edhem-i âheste-rev-i haşmet kim
Gâşiyedârı sanâdîd-i ricâl olsa mahal

O serî’ü’l-hareket rahş-i safâ-bahşı gören
Tayy ider râh-i gamı dilde komaz gerd-i kesel

Nedür ol gerden-i mevzûn-i surâhî-endâm
Ki süheylidür anun kulkul-i mînâya bedel

Getürür gerdişini yâda kümeyt-i câmun
‘Arak-âlûd hırâm itse o gül-gûn-kefel

Hüsn-i reftârına meyyâl kulûb-i ‘uşşâk
Şîvesi ‘işve-i hûbân-i zamân gibi güzel

Yâl-i şeb-gûnına dil-şîfte rûh-i Leylâ
Zülf-i müşkînine ‘anber-Habeşî ‘abd-i akal

Cünbişinde o kadar çüst ü sebük-pâdur kim
Müntehâ-yi nazarıdur ana gâm-i evvel

İtse yâd ezmineyi râkibi hengâm-i şitâb
Ana ol hâlde mâzî görinür müstakbel

Yâ segirdürken eger itse direng-i nâ-gâh
Gâvı mâhî ile yek-laht ider âsâr-i sakal

Mekrümet-pîşe hıdîvâ müte’âlî-kadrâ
Ey hudâvend-i e’âlî vü kibâr-i kümmel

Sensin ol kârgeh-ârâ-yi hıred kim re’yün
Komadı dehrde bir emr-i ‘asîr ü mu’del

Hıfzun ol mertebe kim bezm-i safâda meselâ
Rind-i nâzükle ide zâhid-i dil-saht cedel

Mûm-i hâtem gibi çespîde olup birbirine
Seng-i ta’nı viremez sâgar-i billûra halel

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz