Beğen 0

Arpaeminizade Sami Te’âla'llâh Zihî Taht-i Hümâyûn-i Cihânbânî şiiri

Te’âla'llâh Zihî Taht-i Hümâyûn-i Cihânbânî

Te’âla’llâh zihî taht-i hümâyûn-i cihânbânî
Ki yâr ü yâveridür dâ’imâ te’yîd-i Rabbânî

Şehenşâh-i Ferîdûn-taht ü Dârâ-raht ü ‘âlî-baht
Cihânbân-i muzaffer tâcdâr-i mülk-i ‘Osmânî

O İskender-salâbet mesned-ârâ-yi hilâfet kim
Pür itdi gûş-i dehri savt-i kûs-i şevket ü şânı

Cenâb-i hazret-i sultân Mahmûd hân-i âdil kim
Cihândan seyf ile kat’ itdi ‘ırk-i zulm ü ‘udvânı

O şâhenşeh ki hıfz-i mülkine burhân-i kâtı’dur
‘Adûya bîm-i şemşîr-i kazâ-te’sîr-i bürrânı

Güşâde râyeti ‘ankâ-yi evc-i fevz ü nusretdür
Ki perr ü bâl olupdur ana ‘avn-i lutf-i Yezdânî

Misâl-i bûm-i vîrâne-nişîndür merz-bûmında
Şükûhı ile güm-nâm eylemişdür şâh-i Îrânı

Zamân-i devlet-i sa’d-iktirân-i pâdşâhîde
Bozıldı her mahalde ceyş-i menhûs-i perîşânı

Husûsâ deşt-i Gûrîcânda kim fart-i hezîmetle
Tozutdı leşkerin mânende-i kuhl-i Sıfâhânî

Çekildi çıkdı gitdi çeşmi kaldı lîk hayretle
Göreydi kuhl iderdi bir dahı hâk-i Hemedânı

Bu rüsvâyî vü bed-nâmî-i nâ-fercâmdan sonra
Hatâ-yi fâhişi oldı karîn-i fehm [ü] iz’ânı

Bilüp haddin ferâgat eyledi da’vâ-yi şâhîden
İkâmetgâh-i idbârı idindi künc-i nisyânî

Kalup nâ-çâr hubb-i çâr-yârâsâ derûnından
Çıkardı ‘âkıbet sevdâ-yi ceng ü harb-i ‘udvânı

Fütâde oldı dâmân-i recâ-yi sulha âhir-kâr
Olup sultân-i ‘âlem-gîrün ez-dil ‘abd-i fermânı

Görüp izhâr-i ‘aczin pâdşâh-i merhamet-güster
Hurûş itmişdi ol dem bahr-i bî-pâyân-i ihsânı

Mukaddem itdügi güstâhlıklardan geçilmişdi
Olup ma’füv güzeşte bî-nihâyet cürm ü ‘isyânı

Zuhûr itmiş iken sultân-i heft-iklîm-i âfâkun
Kabûl-i in’ikâd-i sulh ile lutf-i ferâvânı

Ferâmûş itdiler yek-ser bu cûd-i şefkat-âlûdı
Kızılbaşun n’ola mahzûl olursa kavm-i fettânı

Reh-i âyîn-i dîni gibi yanlış semte ‘azm itdi
Revâfız devletinün kec-reviş mîrân ü hâkânı

Hezârân irtikâb-i hîle vü hud’ayla meydâna
Çeküp Tahmâs-kulı didükleri bî-dîn ü îmânı

O dahı câhilâne cünbiş-i pindâr ü nahvetle
Nümâyân itdi fesh-i sulh ü nakz-i ‘ahd ü peymânı

O kâfir-mâ-cerâ gösterdi encâm-i fesâdâtın
İdince vehle-i ûlâda Bagdâd üzre tugyânı

Gelüp da’vâ-yi merdâneyle nezd-i hısn-i merkûma
Sekiz ay denlü tazyîk eyledi ol cây-i ‘umrânı

Binâ-yi ‘ömri olmaz mı harâb-âbâd o mel’ûnun
K’ide ma’mûre-i dârü’s-selâma kasd-i vîrânî

Hüsâm-i intikâmın ehl-i İslâm eyledi ihrâc
Zuhûr itdükde andan böyle vaz’-i nâ-müselmânî

Şehenşâh-i hümâyûn-câh ü İskender-sipâh âhir
İrâde itdi istîsâl ile men’ itmege anı

Muhassal bildürüp mikdârını seyf-i şerî’atle
Vekîl-i mutlakına def’i içün itdi fermânı

Vekîl-i saltanat gayret-keş-i devlet ‘Alî paşa
Çün itdi meşveret cem’ eyleyüp a’yân ü erkânı

Muvâfık eyledi tedbîrine takdîrini Mevlâ
İdüp mülhem o düstûr-i sadâkat-kâr-i zî-şânı

Her işde ittifâk ü meşveretle kâr-sâz oldı
‘Aceb mi olsa re’yi mazhar-i tevfîk-i sübhânî

Şecî’ ü nâmver ‘Osmân paşa-yi nîkû-re’yi
İsâbet eyleyüp itdi sipeh-sâlâr-i sultânî

Bu kâr itmâmına sıdk ile dâmen-der-miyân oldı
Şeb ü rûz itmedi hîç temşiyetde zerre noksânı

Mühimmâtın idüp cümle tedârük eyledi tertîb
Yanınca yer getürmez leşker-i bî-hadd ü pâyânı

Vücûd-i mülkini tashîh içün ifsâd-i şerrinden
Hakîm-i re’yi bu dâ’ü’l-udâle buldı dermânı

Bu emr-i hayrda sa’y itdi hakkâ âsaf-i a’zam
Du’âlarla teveccühlerle cismânî vü rûhânî

Tamâmen lâzım-i ser-’askeri tekmîlden sonra
Gidildi düşmen üzre kat’ idüp deşt ü beyâbânı

Vürûdından habîr oldukda ceyş-i ehl-i İslâmun
Gürûh-i şî’anun ser-hayl-i cünd-i nâ-be-sâmânı

Geçüp on iki sâ’at karşu geldi çünki Bagdâda
Turur taglar gibi pîşinde gördi ceng-cûyânı

Hurûşân olmada emvâc-i seyl-i kûhsârâsâ
Guzât-i müslimînün fevc fevc olmış dilîrânı

Müretteb saf-keşîde muntazırlar kahr-i a’dâya
Müheyyâ leşker-i encüm-şümâr-i âl-i ‘Osmânî

Neye ugradugını bildi Tahmâsb-kulı kâfir
Görince bu salâbetle bu tavr-i ehl-i îmânı

Ne çâre urdı kendin kulzüm-i pür-hûn-i heycâya
Karışdurdı biraz çirk-âb-i şûrı bahr-i ‘Ummânı

Tokuz sâ’at tamâmen gâh cezr ü gâh medd itdi
Yem-i harb ü vegânun cûşiş-i emvâc-i tûfânı

Nesîm-i fevz ü nusret ‘âkıbet esdi murâd üzre
Olup çün cânib-i İslâmiyâna ‘avn-i Rabbânî

Kırıldı leşkeri mecrûh olup kendi firâr itdi
Hudâ imdâd içün gönderdi bî-şübhe sürûşânı

Hemîşe eyleye a’dâsına Hak gâlib-i mutlak
Nice bu gûne nusretlerle şâhenşâh-i devrânı

Serîr-i saltanatda tûl-i ‘ömr ile safâlarla
Mü’eyyed eyleye Mevlâ o sultân-i cihânbânı

Ser-i ceyşi düşüp Sâmî didiler çün ana târîh
‘Acem geçdi kılıçdan bozup anı cünd-i ‘Osmânî

Sene 1146

 

© Bu şiirin her türlü telif hakkı şairin kendisine ve / veya temsilcilerine aittir.

Arpaeminizade Sami

Sitemizde şaire ait toplam 40 eser bulunmaktadır.




Yorumlar

Henüz yorum yapılmamış.

Yorum Yaz